Read by Reader/Choir Director Iliodor “Eddie” Merculieff
Photo credit: Iliodor Henry Kozloff
Matthew 2:1-12
1. I’isuusax̂ Txin agukuĝaan Iyud̲iiyam Vifliyiimagan ilaan Hiruud̲ax̂ tanamaguuĝugan aslagaan;
I’irusaliimam hadan Vulxvan qigaqum hadagaan waaĝanan, tunux̂talix:
2. Qanangun Iyud̲iiyam Tanamaguuĝugan aĝasaaĝuu alix? Tumaniin qigaqum ilan
sdaa ukuĝakum, maalalix Angadan kanax̂sxaaganaan waaĝalgakux̂.
3. Tanamaguuĝuu Hiruud̲ax̂ wakun tusix txin ahmaninax̂ kayux asix I’irusaliimam
husuu.
4. Itaangin ̲kamga ̲tukungin kayux aĝiidgun haqatan husungin taxsalix, qanangun
Xristuusam agulgaduukanaa, iliin amayaax̂tanax̂.
5. Hamakun ngaan tunuqangin: Iyud̲iiyam Vifliyiimagan ilan; umakun tununam
alux̂taasaqagan matakungin waya:
6. Kayux txin Vifliyiimax̂, Iyuud̲am tanaa, Iyuud̲am tanadguchiigamagin ilangiin
kinguuĝimin matalakax̂txin; ilkiimin aygagnam kamga aĝaduukakuĝaan malix,
haman tayaĝuning, Israayilan, atxaĝusaduukakux̂.
7. Hingaan aslaan Hiruud̲ax̂ Vulxvan igiim aĝudusalix ilangiin, aslaan sdam aĝaqaa,
hax̂saasanaaĝinax̂ .
8. Maasakin Vifliyiimam hadan uyachx̂ikin, ngiin tunuqangin: hamaanulix aniqdux̂
hax̂saasasiĝaax̂txichi; aman ukuguumchi, nung hiqachi, kayux ting
hamaanulix Ngaan kanax̂siikangaan.
9. Hamakun tanamaguuĝugan ix̂tanangin tutaqadaamang txidin aygagnan; waya,
aman sdax̂ qigaqum ilan ukux̂taqangin kadangin aygaqaa; hingamasix aniqdum
ilan aqagan qusan hamaaĝalix, txin atxinax̂.
10. Malix hamakun sdam txin atxinaa ukulix txidin qaĝatasaadanan.
11. Ulam nagan qangulix, aniqdux̂ ukunan Anaa Mariiyax̂ asix, malix tanax̂
qingulix Ngaan kanax̂txangin, kayux maayuchxisamang uĝin aĝasix, aĝaasidin:
suulutax̂, laad̲anax̂, smiirnax̂, Ngaan usaqangin.
12. Sngagim ilan ngiin, Hiruud̲am hadan chiilulagaax̂tan, hiisax̂tax̂ sulix, inaqan
akalux̂ axsix tanamang hadan hamaanunan